Plis pase yon 100èn migran Ayisyen rive ayè madi 3 janvye 2023 a, nan Key Largo sou kot Florid la. Sila yo ki te pran lapawòl fè konnen, se akòz vyolans ki gen Ayiti ki fè yo aksepte vwayaje nan ti vwalye yo te debake a.
Osli Cheriscar, youn nan migran sa yo deklare bay jounal Miami Herald “gang k ap tiye pasi pala nan peyi a fè moun paka viv”, alòske se rezon sa li menm li bay pou jistifye prezans li nan kot Florid la, kote ki gen anviwon 3 lòt bato ki te debake ak migran kiben sou li daprè sa jounal la eksplike.
Daprè detay ki bay sou vwalye migran ayisyen yo ki te debake a, kèk Ayisyen ki te ladan l fè konnen li te sòti MòlSenNikola toupre zile latòti, epi yo te pran chimen lanmè a depi nan vandredi ki te 29 desanm 2022 a.
Pou kounya la, selon pòt pawòl gad kotyè a, Ryan Estrada, Ayisyen sa yo sou kontwòl otorite fwontalye yo, epi sila yo ki potko rive sou tè yo sou kèk anplasman gad kot yo.
Pou sa ki gen pou wè ak demach k ap tanmen pou avni migran sa yo, bò kote migran kiben yo, li ta sanble se ekspilsyon dirèk yo adopte. Alòske direktè egzekitif sèvis legal katolik yo, Randolph McGrordy plede pou otorite Ameriken yo ta aplike pwosesis “pè kredib” la pou Kiben yo.
“Yo òdone ekspilsyon rapid Kiben yo, sa m panse yo pa ta dwe fè san yo pa adopte okenn tip entewogatwa pou evite pèsekisyon”, se deklarasyon direktè egzekitif la.
Poutan nan bò pa Ayisyen yo, yo gen pou yo pase tès sa ki pote non “pè kredib” la, pwosesis McGrordy vle pou Kiben yo, nan zòn ladwan Dania beach. Tès sa ap gen objektif pou konnen si y ap depòte Ayisyen yo èske y ap pè sibi posib pèsekisyon yo oubyen si y ap ka jwenn posiblite pou mande azil Etazini.
Si sa fèt konsa, tousuit aprè y ap transfere yo nan nenpòt sant detansyon Etazini, nan lòt ka a si tès la pa reyisi y ap depòte yo nan peyi Dayiti, se sa jounal Ameriken an mansyone.
Atik sa se pwopriyete prive ©️ Gwoup Medya MAGHAITI 2023
World
Discussion about this post