Jan ministè kominikasyon te anonse l nan jou pase yo, Polis Nasyonal Sèvis Kenya anonse otorite ayisyen yo rive nan peyi yo a depi madi 12 desanm 2023 a. Selon yo menm, delegasyon sa ki gen nan tèt li direktè jeneral lapolis la, Frantz Elbé gen pou pase 3 jou nan peyi Kenya pou pale sou preparasyon misyon etranjè k ap gen pou vinn Ayiti a.
“Chèf polis Ayisyen an ki ap dirije delegasyon sa la pou pase 3 jou vizit ofisyèl nan peyi Kenya pou tanmen diskisyon ansanm sou sekirite 2 fòs polis nou yo”, se sa Polis Nasyonal Sèvis Kenya ekri sou kont X yo (ansyen Twitter) pandan yo soulinye rankont sa yo ap bout vandredi 15 desanm k ap vini la.
Nan kad vizit ofisyèl sa yo, responsab polisyè kenyan yo fè konnen ayè madi 13 desanm nan, Franz Elbé ak tout ekip li te fè premye rankont yo ak enspektè jeneral lapolis Kenya a, Japhet Koome epi enspektè jeneral adjwen an, Noor Gabow.
Yon lòt kote, jounal The Star fè konprann delegasyon ayisyèn nan dwe rankontre tou, kèk responsab nan gouvènman William Ruto a epi kontre ak lòt chèf nan lapolis yo a.
Daprè jounal la, vizit ofisyèl sa ki ap fèt la se dènye etap avan pou responsab afriken yo deside voye polis yo an Ayiti. Konsa, yo di otorite yo gen nan lide yo pou voye yon premye ekip k ap gen nan li 300 polisye nan mwa fevriye 2024 la. E yo presize san plis detay, anplis 1000 polisye afriken yo, ta gen 3 000 lòt sòlda ki ap nan misyon etranjè a tou.
Annatandan jij Chacha Mwita bay dènye desizyon l 26 janvye k ap vini la, sou èske polisye Kenyan yo ap ka vinn opere tout bon vre an Ayiti, The Star li menm soulinye li posib pou Kenya ta louvri yon konsila nan peyi Dayiti.
Credit Photo: Citizen Digital
Atik sa se pwopriyete prive ©️ Gwoup Medya MAGHAITI 2023
