Kèk semèn aprè gwo masak ki te genyen nan zòn Bèlè a, moun nan zòn nan deside pale bouch louvri kote yo lonje dwèt sou gang “G9 fanmi e alye” ak lapolis kòm moun ki ta responsab zak vyolans sila ki koute lavi plizyè fanmi ki pase anba flanm dife ak anba bal.
Selon temwanyaj kèk moun nan zòn Bèlè atravè plizyè videyo k ap sikile, masak sa ki te fèt nan dat 16 mas 2023 a, se ta zèv prezime chèf gang G9 an fanmi e alye a, Jimmy Cherizier ak akolit li yo. Nan menm sans lan yo akize tou, kèk polisye ki te debake nan chablennde nan tèt kole ak gang yo pou te vin masakre popilasyon an epi boule kay viktim yo.
Yo fè konnen tou nan jou masak sa, prezime bandi yo te mache ak tout kalte materyèl pou te vin met dlo nan je yo. Gwo zam fannfwa, manchèt, gwo galon jòn chaje ak gazolin, se te pami materyèl yo te itilize pou te masakre pèp Bèlè a.
“Yo pran anpil moun y ale avèk yo, yo boule yo tou vivan, yo mete dife, yo tire 2 moun ki te la nan figi nou yo ale ak yo, elatriye. Mwen menm se bon pye m ki sove m ansanm ak timoun mwen yo“, daprè deklarasyon yon madanm ki fè konprann depi aprè zak vyolans sa yo se nan lari douvan pòt kay moun l ap dòmi ak 5 pitit malgre li son w moun malad.
Yon lòtbò, plizyè lòt moun rive fè vwa yo pase jodi jedi 30 mas la, nan kèk videyo k ap sikile sou rezo sosyo yo kote y ap rakonte kòman yo pèdi pwòch yo nan zòn lan. Se menm ka a tou pou grenn fanmi sa ki pèdi yon jèn dam 35 lane, kote ni manman viktim lan ak tout pitit fi li fè konnen bandi kankannen dam lan .
“Nèg yo pran manman m yo ale ak li tou vivan lè m rele sou telefòn manman m lan yo di m yo gentan boule li. Papa m mouri menm jan an kounya m lage pou kò m“, se kri jèn fi 17 lane sa ki rive pèdi ni manman l ni papa l nan atak prezime gang yo te fè yo sou yo.
Nan bò pa manman viktim lan, se ak dlo nan je li te pran rakonte avan atak la li te avèk Bethie Saint-Louis, ki se non dam sa ki pase anba flanm dife prezime bandi yo, men sa ki pi tris pou li se tande pitit li a mouri kankannen pandan l kite yon pitit fi 17 lane nan men li san l pa gen okenn lespwa lavi miyò.
“Lè yo di m men pitit ou a ap griye la, se lè sa m te konnen yo pran pitit mwen an yo te ale avèk li. M mande jistis pou Bethie Saint-Louis yo pran l y ale avè l, se li menm ki te tout lavi m, se yon granmoun mwen ye se li menm ki te konn tout afè m. Yo kase ponyèt mwen, yo pran pitit mwen an yo ale avè l, m mande jistis pou pitit mwen an“, se kri manman viktim lan.
Atik sa se pwopriyete prive ©️ Gwoup Medya MAGHAITI 2023
