Moun nan komin Kafou mete pye yo atè jounen jodi Lendi 3 oktòb 2022 a, pou penmèt otorite yo tande vwa yo. Pami moun sa yo te gen paran ak elèv abiye ak inifòm, klòch ak pankat nan men, kaye, plim pou mande pouvwa anplas la desann pri gaz la epi mete sekirite pou timoun yo ale lekòl san kè sote, pou ane akademik 2022-2023.
Plizyè 100èn moun nan komin kafou pran lari jounen jodi a pou fè leta anplas la konnen fòk yo reponn ak revandikasyon yo. Pandan mouvman sila, plizyè moun te abiye ak inifòm, drapo yo byen wo, klòch nan men yo. “Lekòl lage” te tounen sèl refren nan bouch manifestan sa yo.
Nan mouvman pwotestasyon sila a ni paran ni elèv ak tout popilasyon an di yo “kanpe rèd“. Daprè yo menm depi gen sekirite timoun yo pral ka ale lekòl “ba nou sekirite pou n al lekòl“, se sa plizyè nan yo t ap di. Manifestan yo pandan tan sa pa te bliye tou pou mande chèf gouvèneman an rache manyòk li, yo te kontinye pou di leta ” yo bezwen voye pitit yo lekòl, anplis mande yo pou lavi chè a sispann bwase bil yo”.
Nan yon kominike pou laprès fè sòti byen bonè lendi 3 oktòb la, Ministè Edikasyon Nasyonal ak Fòmasyon Pwofesyonèl (MENFP), la te toujou kenbe lendi 3 oktòb la, pou tout lekòl te relouvri pòt yo. Nan sans sa, ministè a te rekonèt difikilte ki genyen pou lekòl yo ta louvri premye semenn mwa oktòb la. MENFP te fè konnen tou “yo ap tann lekòl la louvri tipa tipa” pou nou site sa ki ekri nan kominike sila a.
Manifestan yo nan bò pa yo pa te kache move kontanman yo, kote yo te ekri nan plizyè pankat “tout bagay sou kontwòl, lekòl ti pa ti pa“. Pawòl sa yo te ekri nan objektif pou denonse Ministè Edikasyon Nasyonal ak Fòmasyon Pwofesyonèl la ak tout minis zafè etranje a, Jean Victor Généus, ki sanble pa bay mouvman pèp la regle anyen pou li.
Atik sa se pwopriyete prive ©️ Gwoup Medya MAGHAITI 2022
Discussion about this post