Minis edikasyon nasyonal ak fòmasyon pwofesyonèl la, deside jodi mèkredi 14 jen an, opere kèk chanjman sou nòt elèv 9yèm ane yo konn abitye konpoze nan egzamen ofisyèl yo. Nan sans sa, pou ane akademik 2023-2024 la, sou 10 matyè ki genyen yo kandida yo ap gen pou al konpoze sou 300 pwen pou 4 matyè.
Kreyòl, Syans sosyal(ak Edikasyon sitwayen), Syans eksperimantal, inisyasyon nan teknoloji ak aktivite pwodiktif se 4 matyè sa yo koyefisyan yo pral sòti nan 200 pwen pou tonbe nan 300 pwen. Selon presizyon minis la bay, mezi sa yo dwe respekte nan nouvo ane akademik ki pral antre la(2023-2024).
Yon lòt bò responsab levasyon nan peyi a di, tout elèv ki pral pase eprèv sa yo ap gen pou chwazi nan ki lang yo vle konpoze matyè yo. Poutan, se sèlman egzamen lang yo ki pap chanje, sa vle di egzamen espanyòl ap fèt nan lang espanyòl, menm jan sa ap ye pou anglè ak kreyòl.
“Depi pou egzamen leta ane akademik 2023-2024 k ap vini la yo, lè n retire egzamen lang yo, kandida yo ap lib pou chwazi konpoze lòt egzamen yo swa nan lang fransè oubyen nan lang kreyòl la. Pou sa, ap gen 2 menm vèsyon nan nivo sentaks ak lengistik k ap disponib pou yo”, daprè sa minis Nesmy Manigat fè kwè.
Pou sa ki gen pou wè ak 2 lang etranje yo, ki se espanyòl ak anglè responsab la soulinye se depi nan klas 3yèm ane fondamental pou lekòl yo kòmanse aprann timoun yo pale lang sa yo.
Konsa, minis la mande pou tout direktè depatmantal levasyon yo, kòdonatè ansèyman fondamantal yo, enspektè prensipal zòn yo, direktè lekòl prive tankou piblik yo pou respekte epi aplike tout nouvo mezi sa yo ki pran yo.
Atik sa se pwopriyete prive ©️ Gwoup Medya MAGHAITI 2023
