Aprè yo finn pran kontwòl plizye zòn nan Kafoufèy ayè madi 29 dawout 2023 a, nèg ak zam gran ravin yo te pran kontwòl komisarya Savann Pistach la epi mete dife ladan l. Nan menm tan sa, yo te menase pou fin kraze batiman an nèt.
Divès kawotchou limen, yon bonbòn gaz enstale douvan pòt komisarya a, se kèk detay endividi ame yo filme pou montre yo rive pran kontwòl espas polisye yo tout bon nan Savann Pistach. Konsa, aprè yo te finn dekouvri estrateji polisye yo pou te pousuiv yo, yo menase pou kraze komisarya a nèt mete sou jan yo sakaje l deja.
Pandantan sa, yon jou avan aksyon sila direktè jeneral lapolis la Frantz Elbé te fè konnen nan yon konferans pou laprès, lapolis gen gwo operasyon l ap mennen nan zòn Kafoufèy. Nan menm sans sa, li te menm fè kwè yo rive rekipere kèk zòn ki te anba men bandi kote gen plizyè nan yo ki te jwenn lanmò yo.
N ap raple, pandan menm konferans sa, chèf lapolis la te pwomèt nan pa lontan enstitisyon lapolis la ap kapab mete lapè nan zòn nan. Sa ki ap pèmèt tout refijye yo antre lakay yo san kè sote.
Atik sa se pwopriyete prive ©️ Gwoup Medya MAGHAITI 2023
