Aprè plizyè jou ap tire san pran souf nan lakou Pòtoprens, nèg ak zam ap tante aktyèlman pou kraze penitansye nasyonal la jodi samdi 2 mas 2024 la. Selon divès videyo k ap sikile sou rezo sosyo yo, chèf gang Izo ta gen dwon li sou espas prizon an kote divès lòd ap pase pou atake pi byen pi gwo sant kaseral peyi a.
Daprè sa Sendika Nasyonal Lapolis la (SYNAPOHA), fè konnen sou kont X (Twitter) yo nan moman sa menm polisye yo ap fè gwo jefò pou fè fas kare ak nèg ak zam yo. Se pou sa yo lanse yon SOS pou Wo kòmandman an ta voye ranfò prese prese.
Sepandan, divès lòt videyo ta fè kwè pòtay prizon an ta louvri, men ta toujou gen gwo rafal kout bal k ap tire douvan prizon an. Anplis atak sila plizyè lòt zòn twouve yo anba bal aswè a.
Pandantan sa, plizyè sitwayen rive anvayi espas ministè kominikasyon an aswè a pou yo rete, puiske yo te kite lakay yo akòz afwontman lapolis ak nèg ak zam nan anviwon channmas yo.
Atik sa se pwopriyete prive ©️ Gwoup Medya MAGHAITI 2024
