Popilasyon nan zòn ti rivyè Latibonit lanse yon Sos pou leta, akoz nèg ak zam pran zòn sila depi ayè, jedi 20 oktòb 2022 a. Daprè anpil moun nan zòn lan, gwo atak sa ki ap fèt depi yè a, se rezilta yon planifikasyon bò kote gang yo pou ta rive pran kontwòl komisarya ti Rivyè a.
“Fò yo ta ranfòse komisarya”, se kri popilasyon an ak polisye ki twouve yo nan komisarya ti Rivyè a. Daprè sa moun sa yo di, nèg ak zam yo ap tire nan vil la depi 6è nan maten jounen vandredi sa.
Daprè temwanyaj kèk moun nan zòn lan sa gen anviwon yon semèn depi nèg ak zam pa sispann boulvèse zòn nan. “Depi pase yon semèn aprè Direksyon Depatmantal Latibonit (DDA) te leve yon bakòp polis ti Rivyè, depi lè a chak swa depi l fè 6è tout moun antre lakay yo, bandi ap tire nan tout vil la” se sa temwen yo fè konnen.
“Anpil moun nan zòn lan deja ap chape poul yo malgre sa difisil akoz gang yo bare tout vil la”, daprè sa jounalis Fritzon Aurius te mansyone, jounen vandredi 21 oktòb 2022 a, nan jounal Premye Okasyon sou antèn Radyo Televisyon Karayib. N ap raple pou mwa oktòb la, deja gen 2 komisarya polis la gang te atake nan matisan 23, ak nan Tomasen 25.
Atik sa se pwopriyete prive ©️ Gwoup Medya MAGHAITI 2022
World
Discussion about this post