Tousuit aprè otorite ladwàn yo ta derefize bay otorizasyon yo pou yon bato siman ki sòti nan peyi Kolonbi ki rive nan pò Saint Louis du Sud la debake, jodi vandredi 3 novanm 2023 an, abitan yo tanmen bloke wout Nasyonal nimewo 2 a yon fason pou voye yon mesaj klè bay tout moun ki anpeche bato sila debake lakay yo.
“Fòk bato a debake(FBD)”,se nouvo eslogan ki vle fè chimen l jounen jodi a bò kote moun Saint Louis du Sud yo ki vle pou pò yo a kapab fonksyone nòmalman epi pou bato siman sa ki gen 3 jou depi l sòti nan peyi Kolonbi ki jouskaprezan nan pò a kapab resi debake jan yo swete l la. Menm jan sa te fèt pou mobilizasyon konstriksyon kanal la nan Wanament, se konsa tou moun nan Sid yo mobilize pou bato sila ki gen anviwon 80 000 sak siman pa al debake lòt kote osnon nan pò a.
“Pa aksepte bato ki pote siman an ale lòt kote, li lè li tan pou pò entènasyonal Saint Louis du Sud la fonksyone“, daprè mesaj kèk moun nan kominote a tanmen voye bay popilasyon an.
“Pèp Saint Louis du Sud, kanpe goumen pou n pete kanal nou. Fòs ak limyè pou pèp k ap goumen pou dwa ak otodetèminasyon yo“, se sa pòt pawòl komite konstriksyon kanal la, Wideline Pierre ekri sou kont Fesbouk li toujou nan lide pou kore revandikasyon moun nan Sid yo.
Nan menm sans sa, ansyen senatè Edwin Daniel Zenny tout moun konnen sou non Edo Zenny fè konnen l ap sipòte mouvman sa a tou paske li di fòk pò Depatman an kapab sèvi popilasyon an menm jan pò ki nan Pòtoprens yo fonksyone nòmalman yo.
“Pò Sid la fò l ouvè e fòk tout moun nèt met granmoun sou yo pou fè l ouvè”, se sa ansyen palmantè a deklare jodi a, pandan l fè konnen pyès moun nan gouvènman Ariel Henry a pa ta dwe kanpe an fas aktivite ekonomik moun yo ap batay pou li nan zòn Sid la.
N ap soulinye reyaksyon sa yo vini se aprè enfòmasyon yo ta fè kwè otorite dwanye yo ta gen entansyon pou fè bato siman an vinn debake nan lakou Pòtoprens olye pou yo ta kite yo debarase l nan Sid peyi a. Alòske, kèk responsab te fè kwè tout demach te gentan finn fèt pou bato siman an te rive debake toutbon vre nan pò entènasyonal depatman Sid la.
© Tous droits réservés – Groupe Média MAGHAITI 2023
