Minis defans kanadyen an Anita Anand anonse jodi dimanch 19 mas la, misyon bato wayal kanada yo fini sou lanmè ayisyen an. Konsa, minis lan di peyi l la ap toujou fè jefò pou ede Ayiti rejwenn lapè.
2 semèn aprè gouvènman kanadyen an te voye kèk bato wayal yo ki pote non NCSM Glace Bay ak Monkton vinn fè patwouy nan lanmè nou an, jodi dimanch 19 mas la, minis defans yo a Anita Anand fè konnen travay yo t ap fè a rive nan bout li.
“NCSM Glace Bay yo ak Monkton fini ak misyon yo t ap mennen nan dlo ayisyen ak sou kote l yo. Mwen remèsye maren nou yo pou kontribisyon yo sou kesyon sekirite rejyon an“, se sa minis lan anonse sou kont twitè li.
Paralèlman, responsab kanadyen an te tou pwofite soulinye li menm ak tout gouvènman l lan, ap fè tout jefò posib pou sipòte pèp ayisyen an nan lit y ap mennen kont gang yo, sa ki ap pèmèt bon jan sekirite ak lapè rive tabli nan peyi a.
N ap raple pou sèlman kòmansman ane 2023 a, peyi Kanada gentan voye ni avyon ni bato militè l nan peyi Dayiti. Nan eksplikasyon yo te bay sou objektif prezans avyon ak bato sila yo ki pase teritwa ayisyen an, yo te fè konprann se enfòmasyon yo t ap rasanble epi bay kout men nan mete sekirite nan peyi a. Pou kounya, pyès moun pa konnen kisa aksyon sila yo ap pote kòm bon rezilta pou Ayiti nan jou k ap vini yo.
Atik sa se pwopriyete prive ©️ Gwoup Medya MAGHAITI 2023