Konsèy Prezidansyèl Tranzisyon (KPT) an te òganize yon rankont enpòtan ak kèk ekspè nan sekirite nasyonal, pwofesyonèl nan dyaspora a epi lòt pèsonalite pou defini yon estrateji efikas kont kriz ensekirite nan peyi a, mèkredi 22 me 2024 la.
«Lè n konsidere atik 25, 26 epi 27 nan Akò 3 avril 2024 la, Konsèy Prezidansyèl Tranzisyon an ta vle lanse pwosesis pou mete sou pye yon Konsèy Sekirite Nasyonal pou pote yon repons efikas kont ensekirite a nan peyi a», se sa a ki ekri nan nòt yo fè sòti a.
Toujou selon nòt pou laprès sa a, Konsèy Sekirite Nasyonal la pral gen pou misyon defini epi sipèvize tout aranjman yo ki dwe fèt pou pote yon asistans entènasyonal nan sa a ki gen pou wè ak sekirite lè n konsidere rezolisyon 2699 Konsèy Sekirite Nasyonzini te adopte a. Misyon sa a pral gen pou fèt ansanm ak tout aktè ki enpòtan yo epi ekspè nasyonal yo ansanm ak entènasyonal yo pou yo travay kòtakòt.
Pou fini, Konsèy Prezidansyèl Tranzisyon (KPT) an di li renouvle angajman l pou travay ansanm avèk tout patnè li yo pou garanti sekirite ak estabilite nan peyi a. Pandan tan sa a, n ap raple gwoup gang “Viv Ansanm” pa sispann simen latwoublay nan peyi a, yo gentan kraze ak mete dife nan plizyè komisarya nan zòn Pòtoprens lan, tankou komisarya Matisan, Titanyen, elatriye.
Atik sa se pwopriyete prive ©️ Gwoup Medya MAGHAITI 2024
