Kontrèman ak jan sa te anonse pandan dènye jou sa yo, grèv jeneral la pa rive respekte jodi lendi 30 janvye 2023 a. Mete sou kote kèk lekòl ki pa louvri pòt yo, tout lòt aktivite yo reprann aprè jounen protestasyon polisye yo te tanmen jedi 26 janvye pase a.
Nan divès zòn nan kapital la, aktivite yo rive tanmen malgre kèk antite te anonse 3 jounen grèv ki ta dwe kòmanse jodi a pou bout premye fevriye k ap vini la. Sòti Petyonvil pou pase nan zòn dèlma, pa gen okenn difikilte pou chofè yo asire trafik la. Kèk enstitisyon leta tankou Direksyon Jeneral Enpo yo (DGI), Sant Resepsyon epi Livrezon Dokiman Idantite (CRLDI) yo toujou gen moun k ap tann sèvis ajan yo.
Yon lòtbò, menm si tout aktivite sanse reprann nan kapital la, nan vil gonayiv polisye yo kontinye ap eksprime kòlè yo kont Direksyon Depatmantal Latibonit lan (DDA)ki selon yo menm ta dwe ba yo kò 6 polisye yo ki te tonbe nan lokalite Lyankou 25 janvye pase a.
Si nou kwè pawòl polisye sila yo, mouvman yo ta dwe sispann si sèlman yo ta rive jwenn kò 6 polisye yo. Mete sou cha blende ak plis katouch yo mande wo responsab yo pou yo kontinye sèvi nan site endepandans lan.
Atik sa se pwopriyete prive ©️ Gwoup Medya MAGHAITI 2023
Discussion about this post