Daprè deklarasyon prezidan konsèy eskolè nan Miami-Dade la, Mari Tere Rojas pa gen ase pwofesè nan lekòl pwovens Miami-Dade pou anseye elèv ki imigre Etazini yo. Selon divès chif responsab yo, gen plis pase 14 700 nouvo elèv ki sòti Ayiti, Venezwela, Kiba, ak Nikaragwa ki enskri nan lekòl sa yo.
“Tout sa yo se tankou yon gwo tèt chaje. Nou konnen deja depi kèk lane nou manke moun“, se sa prezidan konsèy eskolè nan Miami-Dade la deklare nan tèt kole ak wo administratè, Jose Dotres ki mansyone pou kounya yo pral gen plis timoun pou yo sèvi.
“Antou distrik la enskri plis pase 14 700 nouvo etidyan ki sòti nan lòt peyi, pil moun yo pa t atann vini nan moman distrik la manke moun pou travay, poutan gen plas disponib pou anseyan, se youn nan konsekans pandemi an”, daprè jounal Miami Herald.
Pandantan sa, dosye sa se youn nan sijè ki ta sanble mennen ak plizyè chita pale nan konsèy eskolè a ak tout komisyon eskolè Miami-Dade yo. Nan detay yo bay yo, responsab yo fè konnen, sou 14 723 etidyan enskri nan lekòl yo ki jwenn refij Etazini, se 9 935 ki sòti Ayiti, Venezwela, Kiba ak Nikaragwa sòti 14 dawout 2022 pou rive 10 janvye 2023. Pou lòt etidyan ki enskri yo, daprè yo menm elèv sa yo sòti nan pase 20 lòt peyi tankou Ajantin, Risi, Ikrèn, elatriye.
Nan menm sans sa, jounal ameriken an mete aksan sou nouvo kantite elèv ki genyen pou ane a. Pou komansman ane eskolè 2022-2023 a gen anviwon 2 500 elèv ki ajoute sou 13 404 lòt ki te enskri pou ane eskolè 2021-2022 a, alòske responsab yo te deklare gen anviwon 220 pòs pwofesè ki lib.
Atik sa se pwopriyete prive ©️ Gwoup Medya MAGHAITI 2023
World
Discussion about this post