Nan yon bilan yo bay jodi mèkredi 10 avril 2024 la, responsab yo nan lapolis la fè konnen sòti 26 mas pase a pou rive 9 avril la, yo rive sezi plis pase yon trentèn zam ak anviwon 1 500 bal nan operasyon yo te mennen kont bandi. Pandan tan sa a, yo di tou gen 6 polisye ki te rive blese anplis plizyè bandi ki mouri sou bò pa yo.
Nan divès zam ak bal ki sezi yo pòt pawòl PNH la, Garry Desrosiers, presize yo te jwenn 26 zam ak anviwon 1 500 bal nan pò Okap la, 5 fizi nan dènye operasyon yo te mennen fas bandi sou lanmè a, epi yon fizi ak plizyè santèn bal nan afwontman ak 2yèm gang Site Doudoun nan ki te pote non “New York New York“.
Yon lòt kote, responsab la pale sou arestasyon polisye Ozil Stanford ki ta gen enplikasyon l nan aktivite kriminèl. Pou sa a ki gade lòt materyèl yo sezi pandan dènye jou sa yo, yo fè konprann yo jwenn 6 300 000 goud ak 20 000 dola ameriken, yon bato transpò machandiz, 2 machin ak 9 motosiklèt.
N ap soulinye, nan divès operasyon lapolis mennen yo, gentan gen 3 chèf gang ki tonbe anplis lòt manm gang yo. Ti Greg, Mackandal ak New York New York se non sila yo ki mouri yo.
Atik sa se pwopriyete prive ©️ Gwoup Medya MAGHAITI 2023
