Kwòdinasyon pou laprès nan lapolis la anonse jodi vandredi 5 avril 2024 la, yo rive sezi divès kalte zam nan pò Okap la. Nan bilan yo bay la, yo fè konnen yo jwenn a total 26 zam ak 1000 grenn bal nan operasyon yo tanmen nan pò a.
«PNH la nan tèt kole ak administrasyon ladwàn yo rive fè yon gwo chap nan pò Okap la. Nan premye bilan an nou jwenn 12 fizi daso, 14 pistolè ak yon milye katouch», se sa yo fè konnen nan yon pòs yo fè sou kont Fesbouk yo jodi a, pandan yo montre divès materyèl yo pran yo nan yon bout videyo.
Kon sa a tou, nan operasyon yo te tanmen madi 2 avril pase a yo te soulinye yo te jwenn tou yon fizi daso ak plizyè katouch. Pou sa k konsène arestasyon yo fè yo, ayè jedi 4 avril la responsab yo nan lapolis la arete 2 chèf gang. Gladimyr Joseph ki se 3yèm chèf gang Savyen an ak 2yèm chèf gang Mòn Oje a ki gen pou non Jean Pierre Antoine alyas Palaki.
© Tous droits réservés – Groupe Média MAGHAITI 2024
