Depi plis pase 2 semenn, Kanada te sòti yon lis kote li te sanksyone 2 ansyen palmantè kise Joseph Lambert ak Youri Latortue. Li te akize yo kòm moun ki enplike nan trafik dwòg. Depi lè sa a, peyi Kanada sanksyone anpil pèsonalite ki ta enplike nan finansman gang ak trafik enfliyans. Pami moun sa yo genyen ansyen Prezidan Michel Joseph Martelly, ansyen premye minis Laurent Salvador Lamothe, ansyen premye minis Jean Henry Céan, ansyen senatè Nip Rony Célestin, Ansyen senatè Sid Hervé Foucand epi ansyen depite Dèlma Gary Bodeau. Anpil moun sa yo te site nan yon rapò Kou Siperyè Dèkont.
Sa gen anviwon 3 lane, sòti nan mwa janvye pou rive mwa me 2019, Kou Siperyè dèkont te gentan sòti yon rapò defavorab kont ansyen chèf primati Laurent Salvador Lamothe pou move jesyon 3.8 milya dola gouvènman li an t ap jere ansanm avèk ansyen prezidan Michel Joseph Martelly pandan ane 2012 pou rive 2014 nan peyi a.
Kou Siperyè dèkont ak kontansye Administratif (CSC/CA) te gentan endekse gouvènman Laurent Salvador Lamothe la ki te rive adopte 5 rezolisyon nan kad pwojè petwokaribe a :
“1) 18 jiyè 2011, lajan 96.195.625.80 dola Ameriken
2) 21 desanm 2011: 32938673504 dola Ameriken
3) 11 desanm 2013 : 164.517.228.97 dola Ameriken
4) 23 jiyè 2014: 71.215.839.38 dola Ameriken
5) 10 septanm 2014: 7000.000.00 dola Ameriken”.
Kidonk, gen an total 668.315 429.19 dola Ameriken ki depanse sou rejim li an nan fon lajan petwokaribe a selon rapò sa.
Toujou selon menm ògan administratif sa : «Gen plis pase 1.333.583 670 milyon dola ameriken ki gaspiye nan 234 pwojè ki te prezante nan premye rapò Kou Siperyè dèkont lan.»
Anplis, sou gouvènman Laurent Lamothe avèk Michel Martelly a, trezò piblik ak bank santral te gaspiye 128 milyon dola Ameriken pou kò li sèlman selon dokiman nou konsilte.
Nan yon fason plizomwen detaye sou rapò a, te gen yon dekèsman pou 430 milyon dola ameriken, 49 milyon dola pou lojman sosyal ak 115 135 483 milyon dola ameriken pou pwogram sosyal, 550 milyon dola ameriken pou sibvansyon kouran nan peyi a epi 189368187 dola ameriken te depanse pou sant espòtif nan lajan petwokaribe a, toujou selon rapò Kou Siperyè dèkont an janvye 2019.
Pouvwa Martelly ak Lamothe la te mete yon ansanm pwogram ki te pote non sa yo: «Aba grangou, Ban m limyè ; ban m lavi: Katye Pa m poze; Ede Pèp, Ti manmi Cheri, Kote Etidyan, Kore peyizan, Kore Andikape, kantin mobil, panye solidarite, bon solidarite epi resto pèp.»
Kou Siperyè Dèkont ta pral raple nou Olivier Martelly ki se pitit ansyen prezidan Michel Joseph Martelly te gen: «189 milyon dola vèt nan men li pou l te jere tèren espòtif.»
Kidonk, gouvènman Martelly ak Lamothe epi Evans Paul la te tonbe nan yon veritab eskandal akoz dilapidasyon lajan petwokaribe a, pandan pasaj yo nan tèt peyi a. Sak te lakoz plizyè jenn fanm ak jenn gason te manifeste nan peyi a plizyè fwa pou denonse zak gaspiyaj sa, presizeman gwoupman “Petrochallenger“.
Yon lòtbò nan ankèt ansyen palmantè Arnel Bélizaire te mennen ak depo yon rapò li te fè nan palman an, li te akize: «Ansyen premye minis Laurent Salvador Lamothe avèk Salime Sucar, kòm moun ki te achte 200 zam lagè, sòti peyi Izrayèl pase nan peyi Kanada pou vin an Ayiti nan lane 2013.»
Yon lòtbò ansyen prezidan Jovenel Moïse pandan manda li nan lane 2017, te nome 50 jij nan lide pou yo te fè limyè tabli sou pwosè petwokaribe a nan lane 2017, men lajistis pa te janm rive pwononse li sou akizasyon Inite Lit Kont Koripsyon ak Kou Siperyè dèkont Kontansye Administratif (UlCC ak CSC/CA).
Toujou nan kad dosye gaspiye lajan petwokaribe, selon Fondasyon Je Klere (FJKL), «Ansyen premye minis Laurent Salvador Lamothe te peye jij Ramoncite Alcime nan dat 30 me 2019, 300 mil dola Ameriken pou li te blanchi l nan kad entèwogatwa li.»
N ap raple nan moman n ap pale la, ansyen premye minis Laurent Salvador Lamothe avèk Michel Joseph Martelly se 2 ansyen kolaboratè peyi Kanada akize kòm moun k ap finansye gang ak kreye enstabilite nan peyi a.
Atik sa se pwopriyete prive ©️ Gwoup Medya MAGHAITI 2022
