Aprè yo te fin kanpe tout vòl yo te gen sou Ayiti nan kòmansman mwa mas la akòz ensekirite a, kèk konpayi ayeryen fè konnen ayè jedi 18 avril 2024 la, y ap gen vòl sou Ayiti nan mwa me 2024 la. Daprè Miami Herald, American Airlines ak JetBleu Airways se 2 nan konpayi sa yo ki panse retounen nan fè vòl pou vin Ayiti.
«Americain Airlines anonse depi kounye a vòl pa yo ka reprann pou pi bonè 2 me. Pandan tan sa a, JetBleu Airways di yo panse pou yo toujou reprann vòl yo ant Pòtoprens ak ayewopò entènasyonal Fò Lodèdal-Oliwoud ak Jhon Kenedy jous 15 me», daprè sa yo mansyone. Pou sa ki konsène konpayi Spirit Airlines yo fè konnen yo menm aktivite pa yo pa ko ap reprann.
Yon lòt kote, jounal la soulinye Depatman Deta ameriken an te anonse yo p ap trete okenn dosye ki gen rapò ak viza nan moman sa yo, men yo fè kwè gen 2 mwayen pou yo ta fè sa a. Premye sa yo di, se sèlman si ta gen ijans pou lavi oubyen lanmò, men menm nan ka sa tou fòk kandida yo ta bay prèv pwojè vwayaj yo. Lòt mwayen an, se pou kandida yo ta vwayaje pou al nan yon lòt peyi pou fè demann lan nan yon konsila oubyen Yon anbasad ameriken.
«Pou sa fèt, yon moun k ap fè demann lan dwe avan tout bagay ekri anbasad oubyen konsila ameriken peyi li vle al mande pou yo menm ka transfere demann viza a nan anbasad amerikèn ki Pòtoprens la pou egzamen. Moun sa a, dwe ka vwayaje legal nan peyi sa, e l dwe prepare l pou rete jouskaske demann li an fin trete», se presizyon jounal ameriken an fè sou dosye demann viza a.
Atik sa se pwopriyete prive ©️ Gwoup Medya MAGHAITI 2024
