Nan yon entèvansyon komisè gouvènman Miragwann lan Ernest Muscadin fè jodi mèkredi 22 mas 2023 a sou radyo Magik9, li fè konnen toutotan li la l ap toujou batay kont bandi k ap bwase bil popilasyon an kèlkeswa kote l pase.
Komisè Muscadin se youn nan kad nan leta ayisyen an ki malgre tout kritik li pran pa rapò ak filozofi l fas ak bandi, toujou fè konprann l ap fè tout sa l kapab pou l kwape bandi k ap bay pwoblèm. Se nan menm sans sa tou, responsab la deklare jodi a li son w obligasyon pou gen yon moun ki ka di non epi ka kanpe an kwa pou desitire gang yo nan peyi a.
“Toutotan m la kòm komisè gouvènman m ap toujou kanpe goumen ak nèg yo. Muscadin pa yon nèg ki andoktrine, m pran fòm yon vaz ki jodi a la vle debòde nan peyi a, yon bann vwayou ki gen zam nan men yo k ap tire tout kalte moun, jodi a fòk gen yon moun ki pou di non, fòk gen yon moun non sèlman ki pou di non men ki pou chwazi kanpe anfas nèg yo“, daprè sa l deklare.
Nan yon bò, responsab depatman Nip lan fè konprann tout moun k ap kritike fason l aji ak bandi yo se dwa yo pou yo kont li, men li di l pa pè pyès moun ki kont zak li yo.
Pou sa ki gen pou wè ak resous zam ak minisyon, komisè a di si se ta pou leta li pa t ap janm ka kanpe goumen kont prezime bandi, paske daprè li menm, leta pa gen materyèl menm minòt ki pi piti yo pa rive ba li.
Yon lòt bò, Komisè Muscadin fè responsab polisyè Pòtoprens yo yon pwopozisyon ki se pou bay polisye yo libète pou elimine tout bandi k ap bay pwoblèm nan sosyete a, epi chache mwayen pou mache sou tout baz gang san bay okenn endis sou operasyon ki ta dwe tanmen yo. Nan fason sa selon li menm, sa ap pèmèt polisye yo gen avantaj kote antèn bandi yo pap gen okenn pouvwa pou gentan enfòme yo.
Atik sa se pwopriyete prive ©️ Gwoup Medya MAGHAITI 2023
