Fondasyon Je Klere ( FJKL) mande jounen mekredi 18 janvye a nominasyon
yon lòt jij pou panche sou dosye petwokaribe a, paske jij Ramoncite Accimé nan lis jij konsèy siperyè pouvwa jidisyè a( CSPJ) pa sètifye yo.
Selon enfòmasyon Direktris egzekitif Fondasyon Je klere, Marie Yolène Gilles fè konnen nan yon entèvyou maten an sou radyo Magik9, Dwayen Chavanne Etienne dwe nonmen san pèdi tan yon lòt jij ki sètifye pou panche sou dosye petwokaribe a.
” Se pou sa, jodia nou mande dwayen an, mèt Chavanne Etienne poul degaje l kou mèt jan jak pou li mete yon lòt jij. Fòk jij sa sòti pami jij ki sètifye yo, pou yo kapab remèt li dosye petwokaribe a” sa se deklarasyon Marie Yolène Gilles.
“Gen yon kesyon popilasyon ap mande depi konbyen tan kote kòb petwokaribe a?
Men jij la pa fè anyen nan kad dosye sa se miltipliye lap miltipliye richès an Ayiti ak aletranje. Nou menm nou egzije yo nome yon jij rapido presto pou kapab fè limyè sou dosye sa” pawòl militant Marie Yolène Gilles di nan entèvasyon li maten an.
Nap raple Jij Ramoncite Accimé kise Jij ki te sou dosye Petwokaribe a pandan plizyè ane, nan lis 30 majistra CSPJ pa sètifye yo . Selon CSPJ, jij sila pa sètifye akoz li manke entegrite moral.
Diplis, Pou nouvo Jij ki sipoze nome a, Marie Yolène Gilles fè konnen fòk li se yon jij ki pwòp, ki sètifye pou nou pa tonbe nan kesyon kowonpi kap mennen ankèt sou moun ki kowonpi yo.
Atik sa se pwopriyete prive ©️ Gwoup Medya MAGHAITI 2023
