Kontrèman ak sa Ministè Edikasyon Nasyonal ak Fòmasyon Pwofesyonèl (MENFP) la te fè konnen 26 dawout 2022 a, pou relouvri lekòl la ki te sipoze fèt 3 Oktòb, jounen jodia fè 3yèm jou, kote tout lekòl fèmen pòt yo. Lari a se sèl kote lekòl «Ti pa Ti pa» respekte pou kounya.
Nan prèske tout vil peyi a, manifestan yo pran fòm eslogan ministè edikasyon an, si n ap kwè imaj, pawòl epi jan yo abiye, nou ta rive di lekòl la li menm li deja kòmanse nan lari a. Inifòm, drapo, plim, kaye, klòch, galon jon tounen pi gwo senbòl pèp ayisyen an, pandan premye semèn mwa oktòb la, toujou nan lide pou manifeste kont gouvènman Ariel Henry an ak tout akolit li yo.
Nan vil Okap, popilasyon an anonse yon lòt jounen manifestasyon pou kontinye rele chalbare dèyè leta anplas la. Nan sans sa, pou evite politisyen yo gen kontwòl epi pase anba pye mouvman yo, dirijan batay Ouvriye yo nan 2èm vil peyi a di : «Se ouvriye yo ak mas pèp la ki pou nan tèt manifestasyon yo.»
Nan vil Tigwav sitiyasyon an pa chanje, sitwayen vil la toujou kanpe dèyè barikad yo. Pandanstan, pwofesè, elèv, direktè, paran tout oblije chita ap gade lojik lekòl «ti pa ti pa» ministè edikasyon nasyonal la.
Youn nan moun ki nan tèt manifestasyon sa yo pwofite mande pèp la : «Pou kontinye batay jiskaske pouvwa anplas la bay tèt pouvwa a.»
Li te tou denonse epi kondane sila yo k ap fouye moun sou barikad yo, daprè sa korespondan Radyo Karayib, Joseph Anel fè konnen jodi mèkredi 5 oktòb la.
Menm jan sa te prezante depi lendi 3 oktòb la, se toujou menm konsta a ki fèt nan vil yo ak depatman yo. Depatman Nòdes la se menm bagay la okenn lekòl pa louvri pòt yo. Sendika anseyan yo nan depatman Nòdès kanpe an kwa pou di yo p ap dakò koze lekòl nan konjonkti sa a. Konsa, yo envite tout paran, anseyan epi elèv pou mete ansanm pou kontinye revandikasyon yo.
Aprè 6 semèn lòk sou teritwa nasyonal la, nan divès vil ak depatman peyi a, popilasyon an pa deside kite beton an. Mete sou sa, jounen jodi mèkredi 5 oktòb la, make 3yèm jounen kanpe san pran souf kont pouvwa anplas la ak minis Edikasyon Nasyonal ak Fòmasyon Pwofesyonèl (MENFP) la, Nesmy Manigat ki sanble pa konnen zafè lavi chè k ap bwase bil pèp lan an patikilye paran yo ak pwofesè yo.
Atik sa se pwopriyete prive ©️ Gwoup Medya MAGHAITI 2022
Discussion about this post