Nan yon nòt yo sòti jodi jedi 7 mas 2024 la, gouvènman ayisyen an sou lòd Patrick Michel Boisvert, anonse depi jodi a menm dwe gen kouvrefe pou rive jous lendi 11 mas k ap vini la. Menmsi premye kouvrefe a pa t itil anyen, gouvènman an presize desizyon sa se toujou nan kad pou reprann kontwòl sitiyasyon an nan peyi a, se pou sa yo tou entèdi moun manifeste pandan peryòd eta ijans yo pran an tou.
“Nan lide pou tabli lòd epi pran mezi ki egal pou n reprann kontwòl sitiyasyon an, gouvènman an dekrete yon kouvrefe sou tout teritwa a sòti 6è nan aswè pou 5è nan maten”, se sa yo di pandan yo soulinye mezi sa ap pran sòti jodi jedi a menm pou rive lendi 11 mas 2024 la 8è nan aswè pou 5è nan maten.
Sepandan kontrèman ak 3 jou kouvrefe ki te bay deja yo, gouvènman an fè tout moun konnen pandan mwa eta ijans la pinga gen pyès mouvman manifestasyon nan depatman lwès la. Sa konsène tout wout piblik yo e li valab pou lannuit tankou lajounen. Konsa, yo soulinye fòs lòd yo resevwa bonjan lòd pou fè kèlkeswa moun li ye a respekte desizyon sa e pou yo arete tout moun ki kont lide sa tou.
N ap raple selon sa otorite yo di, mezi sa yo pa konsène ajan fòs piblik ki an sèvis yo, ponpye, anbilansye, pèsonèl sante yo ak tout jounalis ki ka byen idantifye yo.
Atik sa se pwopriyete prive ©️ Gwoup Medya MAGHAITI 2024
