Nan yon tèks li pibliye Jodia, nan dat madi 14 jen 2022, Gessica Geneus eksplike ki rezon ki fè jiskounya Freda poko ka rive an Ayiti, malgre plizyè eksplwa ak pwojeksyon li nan plizyè peyi etranje.
Selon li rezon an senp pou nou konprann, daprè reyalizatris Gessica Geneus, se pa li sèlman ki pwopriyetè fim nan, paske se 70% lajan peyi Lafrans ki finansye fim sila epi penmèt li fèt. Kidonk, se peyi sa k ap gen dwa pou di kilè oswa kijan pou “Freda” distribye.
“Se mwen ki ekri li, se mwen ki reyalize li, mwen pase 4 lane t ap travay sou li san mwen pa te peye tèt mwen, men ofinal li pa pou mwen. Paske, yon fim se pou peyi ki mete plis lajan ladann nan li ye.”
“Freda pou Lafrans an premye, paske yo bay 70% lajan ki fè li. Se pou sa, li sòti la epi se yo ki deside kibò ak kòman fim nan ap distribye. Anplis, se pou sa mwen te oblije tann otorizasyon yo pou mwen fè toune an Ayiti“, selon sa Gessica Geneus ekri sou paj li.
Nan tèks sa, Gessica Geneus fè konnen li pa te jwenn okenn sipò leta ayisyen pou li te reyalize Fim Freda, men se gras ak peyi Lafrans ki fè Freda rive fèt.
Li kontinye pou l ajoute : “kòm se ministè kanaval nou genyen (e menm sa yo mal fèt), mwen pa te jwenn ase lajan Ayiti, pou m te fè li. Sipò FOKAL ak Anbasad Suis pa te sifi pou ban m pouvwa sou fim nan”.
Domaj, se reyalite nou kòm pèp! Menm batistè Ayiti pa pou li, paske nou pa konn envesti nan sa ki enpòtan pou nou, nou pa gen dwa lapawòl sou li.
Pwodiktè fransè mwen an se yon moun ki fè san soti nan wòch pou fim nan Egziste ansanm ak pwodiktè Bénin an. Epi, si se te pou lajan Ayiti, Freda pa t ap janm egziste.” Deklarasyon Gessica Geneus fè nan tèks la.
Plizyè bagay pwouve fim Freda a gentan disponib ilegalman nan peyi Dayiti, sitou sou platfòm sa yo: Telegram ak Tik Tok depi kèk jou. Ta sanble se akoz pirataj kèk moun ki fè fim sa, kèk Ayisyen gen aksè ak wè li.
N ap raple depi lè li te fin fè gran sòti li, Freda te gentan ap sikile aprè sa nan samdi 21 dawout 2021, nan KARIBE CONVENTION CENTER, nan peyi Ayiti. Pou yon moun te gen aksè ak fim nan, kote biyè yo te gentan vann ak 35 dola ameriken oubyen 3750 goud nan peryòd sa.
Óganizatè pwojeksyon fim nan te anonse 50% lajan ki te antre nan evennman sa ta pral jwenn moun nan sid ki te frape ak gwo tranbleman tè nan dat 14 dawout la.
Daprè plizyè enfòmasyon nou ta fè konfyans, Gessica Geneus anonse yon toune k ap prepare pou Ayiti ak fim sa. kounya nou konprann rezon ki fè toune a potko kapab fèt nan peyi kote Freda te reyalize a.
Depi yon lane, fim Freda jwenn anpil siksè nan monn lan, li bouke resevwa pri nan divès peyi lòtbò dlo, sesi nan plizyè kontinan. Aprè sòti Freda, li te seleksyone nan plizyè festival entènasyonal, tankou sa yo: Festival des Cannes, nan peyi Lafrans li te resevwa pri “Francois Chalais”.
Anplis, li te seleksyone tou pou Oscars 2022 a. Li resevwa “cercle d’or, meilleur long métrage de fiction”, nan 9èm edisyon ” Festival du cinéma du monde de Sherbrooke”.Pa twò lontan konsa, presizeman nan mwa jen an , Aktris prensipal Freda ki se Néhémie Bastien sot resevwa pri meyè aktris nan “Festival de Cine Africano-FCAT”.
Bethaida Bernadel
Atik sa se pwopriyete prive © Gwoup Medya MAGHAITI 2022
