Nan yon nòt Federasyon Foutbòl Ayisyen an (FHF) mete deyò jodi lendi premye me a, responsab yo fè konnen se Ispano-ajanten ki rele Gabriel Calderón nan ki ranplase Jean Jacques Pierre nan tèt ekip Foutbòl Ayiti a.
Ayè dimanche 30 avril la kontra Jean Jacques Pierre ak FHF fini. Nan semèn ki sot pase a anpil rimè te fè konprann responsab yo pa vle kontinye ak antrenè a. Nan sans sa, Federasyon Foutbòl Ayisyen an fè konnen se Gabriel Calderón ki pral asire enterimè a.
“Mesye Gabriel Calderón Pellegrino se aktyèl konseye teknik FHF la. Li gen anpil eksperyans an Espay (Real Betis, Malaga, Leganes, Getafe), an Emirat Arab Ini (Al Wasi). Li se yon moun ki gen anpil konpetans“, selon sa Federasyon Foutbòl Ayisyen an fè konnen.
Teknisyen sa ki genyen 37 lane a pral genyen pou l dirije Grenadye yo nan Gold Cup 2023 a. N ap presize FHF pa di ki dat kontra antrenè a ap fini.
Atik sa se pwopriyete prive ©️ Gwoup Medya MAGHAITI 2023
