Nan yon konferans pou laprès jodi lendi 28 dawout 2023 a, direktè jeneral lapolis la, Frantz Elbé fè konnen lapolis la pa gen anyen pou wè ak masak ki fèt samdi pase a sou fidèl legliz pastè Marco a. Nan sans sa, responsab la deklare gen yon ankèt ki louvri nan Direksyon Santral Polis Jidisyè (DCPJ) a yon fason pou jwenn tout koupab yo.
«Lapolis te fè tout sa l kapab pou li te evite foul la rive nan destinasyon l, malerezman foul la te gen plizyè bout epi li te rive depase dispozitif sekirite lapolis te mete anplas yo, sa ki te vin penmèt dram sa pou peyi a», selon deklarasyon responsab la ki fè kwè wo kòmandman lapolis la te pase tout chèf jiridiksyon yo lòd pou te anpeche moun yo ale fè fas ak gang yo.
Konsa nimewo 1 lapolis la pwomèt tout moun ki te enplike nan masak sa ap jwenn santans yo nan men otorite jidisyè yo.
Yon lòtbò, direktè Jeneral lapolis la fè konnen gen divès operasyon ki tanmen nan tout peyi a kote gen anpil nèg ak zam ki mouri epi anpil baz yo rive kraze. Operasyon sa yo selon Frantz Elbé, ap penmèt tout moun ki te abandone kay yo retounen lakay yo nan jou ki pral vini yo.
Atik sa se pwopriyete prive ©️ Gwoup Medya MAGHAITI 2023
