Nan yon kominike pou laprès ayè madi 4 jiyè 2023 a, Fondasyon Je Klere (FJKL) kondane desizyon otorite nan lapolis yo pran pou transfere anviwon 30 polisye ki te nan komisarya Gonayiv la. Nan sans sa, òganis la mande pou responsab yo reflechi pandan y ap anile desizyon sa yo di ki te mete kèk jij enstriksyon anba gwo danje.
Pami polisye sa yo wo kòmandman an deside transfere sòti nan komisarya Gonayiv la, gen 2 ladan yo patikilyèman ki te tou jwe wòl ajan sekirite pou kèk jij, tankou Jij enstriksyon nan tribinal premye enstans Gonayiv la, Louima Louidor, ki te gen kòm sekirite Wilson Simon ak Willence Derivale( ki li menm te gen ajan Baby Sénatus). Toujou nan menm kominike sa FJKL sòti a, li fè konprann klèman se yon move desizyon otorite polisyè yo pran.
Daprè presizyon Fondasyon Je Klere fè li fè konnen rezon ki fè li pa dakò epi menm mande pou anile desizyon sa, se akòz 2 jij enstriksyon sa yo anba gwo menas gwoup gang “Kokorat san ras” la, dèske yo ta enplike yo nan konbat tout nèg ak zam k ap simen latwoublay nan site endepandans la.
Yon lòtbò, daprè «Radio Référence», jij Louima Louidor ta li menm tou reyaji kont desizyon sa, paske li fè kwè, li fè ajan sekirite li a anpil konfyans. Li deklare pou l di : «Transfere Wilson Simon, se tankou yo vle entimide l osnon asasinen l.»
Avèk transfè sa yo, Fondasyon Je Klere di :
«Se mete otorite yo mete lavi majistra yo an danje», alòske li soulinye se yon obligasyon pou leta Ayisyen asire pwoteksyon sila yo ki angaje yo epi pou yo konbat prezime bandi yo nan peyi a.
Atik sa se pwopriyete prive ©️ Gwoup Medya MAGHAITI 2023
