Aprè desizyon Tribinal Abitral Espò (TAS) te pran nan dat 14 fevriye 2023 a pou blanchi ansyen prezidan Federasyon Foutbòl Ayisyen an akoz manke prèv pou sanksyon an, Federasyon Entènasyonal Foutbòl Asosyasyon (FIFA) fè apèl nan menm kad dosye sa devan yon tribinal federal Lasuis pou rekonsidere desizyon an sou fòm rekou.
Federasyon Entènasyonal Foutbòl Asosyasyon (FIFA) te sanksyone Yves Jean-Bart nan dat 18 novanm 2020 an pou vyòl ak tizonnay sou jwè fanm , anplis yo te mande l pou peye 1 milyon lajan Lasuis epi pou li retire l nan tout aktivite ki te gen pou wè avèk foutbòl jiskaske l mouri.
Kòm prensipal motif, dirijan FIFA yo denonse desizyon TAS te pran yo ki ta gen yon vis grav nan pwosedi yo, kote yo pa ta analize tout eleman prèv FIFA te prezante yo. Parapò ak sa : «FIFA kapab konfime li depoze yon rekou kont santans TAS lan devan Tribinal Federal lasuis lan pou mande anile l epi pou yon nouvèl egzamen TAS sou dosye sa».
FIFA ap kontinye pousib dosye sa avèk anpil konviksyon, epi li fè konnen l ap kontinye aplike «zewo tolerans» pou tout zak vyolans seksyèl ki enplike nenpòt ki manm sou jiridiksyon l yo pandan l angaje l pou pwoteje viktim fanm kou gason.
N ap raple nan dènyè konferans pou Laprès, Doktè Yves Jean-Bart te bay nan dat 1e mas ki sot pase la li te anonse l ap retounen nan tèt Federasyon Foutbòl Ayisyen aprè desizyon TAS te pran pou blanchi l yo. Poutan, FIFA ta pral voye jete byen lwen yon lide konsa, kote yo menm menase pou yo ta sanksyone federasyon an si tout fwa ansyen prezidan Federasyon Foutbòl Ayisyen an ta retounen ladan l.
Atik sa se pwopriyete prive ©️ Gwoup Medya MAGHAITI 2023
