Nèg ak zam asasinen anviwon 10 moun jodi jedi 11 avril 2024 la, nan yon nouvo atak yo fè nan zòn Kabarè.
Selon Radyo Mega, anplis moun sa yo ki mouri a gen divès lòt ki blese nan atak sa a.
Selon detay ki bay yo, Moun sa yo rive viktim aprè nèg ak zam te fin anvayi zòn nan espesyalman nan mache piblik Kabarè a. Se yon sitiyasyon, selon medya a, ki te lakòz gwo panik nan komin nan kote responsab biznis yo ak lekòl yo te fèmen pòtay yo yon fason pou yo pa viktim.
N ap raple n, nan yon rapò Rezo Nasyonal k ap Defann Dwa Moun yo(RNDDH) te pibliye ayè mèkredi 10 avril la, yo te fè konnen pou 3 premye mwa ane 2024 la, yo resanse pou pi piti 5 atak ame sou popilasyon an.
Selon yo menm, anviwon 67 moun te pèdi lavi yo pandan atak sa yo endividi ak zam te fè nan Solino, Bedè, Waf Jeremi, Lasalin, Pènye ak Gantye kote bandi yo antre touye moun epi boule kay yo.
Atik sa se pwopriyete prive ©️ Gwoup Medya MAGHAITI 2023
