Pandan bal pa sispann tire nan Petyonvil jodi jedi 21 mas 2024 la, chèf gang Ti Greg ki se youn nan manm “Viv ansanm” nan jwenn lanmò li nan afwontman avèk Lapolis nan zòn Dèlma 66. Selon divès imaj ki vin jwenn nou aktyèlman endividi a ki te sove nan penitansye a, ap benyen nan san li.
Se lapolis menm nan yon nòt yo sòti aswè a ki anonse nouvèl lanmò evade a. “Chèf gang Dèlma 95 la, Ernst Julmé alyas ti Greg mòtèlman blese pandan yon afwontman aprèmidi a avèk kèk Inite nan PNH la“, selon sa ki di nan nòt sila a.
Sepandan depi kèk jou aprè li te sove, li te tounen al bay pwoblèm nan zòn Dèlma 95. Kote, li te kòmanse difisil pou gen aksè ak zòn sa puiske te toujou gen tire pou dènye jou yo.
N ap raple, Ti Greg se youn nan prizonye ki te sove nan Penitansye Nasyonal samdi ki te 2 mas 2024 la. Pandantan sa, li pa te pran tan pou li montre pouvwa li puiske selon divès sous, tousuit aprè li te fizye yon nèg ki te plase avèk madanm li pandan l te nan prizon an.
N ap soulinye tou, lapolis touye tou ayè mèkredi a 4 bandi pami yo chèf gang Mackandal nan zòn Britsou kote popilasyon an te pase l anba flanm dife.
Pou kounya, divès zòn nan Pòtoprens toujou anba anpil tire akòz bandi ak zam pa sispann simen latwoublay. Pòtay Lewogàn, mache Salomon, Channmas, Petyonvil, Dèlma 95 se pami zòn ki sou gwo tansyon aswè a la.
Atik sa se pwopriyete prive ©️ Gwoup Medya MAGHAITI 2024
