Chèf gang Isca Andris jwenn lanmò l nan lannuit dimanch 12 novanm 2023 a, aprè l ta deside pèsonèlman mete yon bout ak lavi li. Selon Radio Galaxie ki site ansyen majistra Site Solèy la, Esaïe Bochard, endividi a ta touye tèt li depi ayè dimanch lan aprè l te santi kò l pa te bon.
Isca Andris ki t ap dirije katye Belekou nan Site Solèy epi ki te yon manm enfliyan nan gwoup gang «G9 an Fanmi e Alye» ta mouri depi ayè dimanch lan. Men, Malgre temwanyaj ansyen majistra Site Solèy la, sikonstans lanmò chèf gang nan toujou pa parèt klè, puiske plizyè sous estime pa te gen okenn afwontman ant li menm avèk yon lòt gwoup gang.
N ap raple non endividi avèk zam sa te site nan plizyè zak banditis ki te fèt nan zòn Site Solèy, pami yo nou kapab site lanmò yon jèn fanm ansent 9 mwa li te touye dimanch ki te 26 jiyè 2020 an. Mete sou sa, selon divès rapò estrikti dwa moun yo te pibliye nan menm ane sa, Isca te fè pati tou bandi ki patisipe nan vyole dwa moun nan peyi a.
Atik sa se pwopriyete prive ©️ Gwoup Medya MAGHAITI 2023
