Nan yon nòt Biwo Suivi Akò Montana mete deyò jounen jodi madi 30 avril 2024 la, ekstrikti a denonse kout mal taye ki fèt anndan konsèy sila. Yo fè deklarasyon sila nan yon nòt yo sòti aprè chwa reprezantan Kolektif 30 janvye a, Edgar Leblanc fils kòm prezidan Konsèy Prezidansyèl Tranzisyon an.
“4 sektè anndan Konsèy prezidansyèl la konplote sou do popilasyon an nan mitan lannuit lendi 29 pou rive madi 30 avril 2024 la”, se sa Biwo Suivi Akò Montana a ekri nan yon nòt, aprè jounen sa ki bay prezidan Konsèy la ak premye minis peyi a.
Tandiske divès pati ak ekstrikti politik salye chwa Edgar Leblanc fils kòm prezidan konsèy la, BSA li menm sou bò pa li denonse vyolasyon akò politik ki te siyen 3 avril la ak tout pwojè dekrè kreyasyon, epi òganizasyon ak fonksyonman konsèy la. nan estrikti ki bat bravo yo nou jwenn Pwotokòl 17 Oktòb, Òganizasyon Pèp k ap lite(OPL), Rezo Nasyonal tèt kale, elatriye.
“Lè yo nonmen pou kont yo, san chèche konsansis ki se premye demach ki dwe fèt la, san aksepte prensip vòt, kidonk san eleksyon, yo nonmen yon kòdonatè konsèy la, yon premye minis ak tout gouvènman yo, san respekte mekanis patisipatif yo te siyen an”, ajoute Biwo Suivi Akò Montana nan nòt denonsyasyon li an.
BSA se premye ògan ki te prevwa yon Akò nan pespektif pou te mete kanpe yon konsèy prezidansyèl tranzisyon ak ògan kontwòl tranzisyon nan tèt peyi a. Men jounen jodi a, se yo menm k ap denonse vyolasyon ki ta fèt nan konsèy prezidansyèl sila, kòmkwa fòs politik ak ekonomik yo deside fòk yo pran kontwòl konsèy prezidansyèl la ak gouvènman an pou yo ka kontinye peze souse nan leta a.
Pou fini, responsab akò Montana yo envite tout aktè ki pran move wout yo pou yo resezi yo. E yo mande tou, pou yo antre nan konsètasyon pou pran tèt frèt desizyon ki ap nan enterè peyi a.
Atik sa se pwopriyete prive © Gwoup Medya MAGHAITI 2024
