Batay ant 2 gwoup gang nan komin Site Solèy depi vandredi 8 jiyè 2022, kote gwoup G-9 ak G-Pèp pa sispann tire ak gwo zam otomatik san rete, sa ki ta lakoz lanmò ak blese plizyè moun. Anplis, badi yo ta sanble koupe dlo ak kouran nan plizyè lokalite nan komin nan.
Daprè deklarasyon pastè Jean Enock Joseph, sou Radyo Magik 9 :” Se akoz mesye G-9 rapatriye nan pyè 6 yo te moute pou vin pran teritwa bwa 9 ak pwojè Douya nan men gwoup gang G-Pèp yo ki yo menm riposte”.
Pastè Jean Enock kontinye pou li ajoute :” Nan yon sèl lokalite nan Site Solèy gen plis pase 40 moun ki blese anba bal bandi nan kad gè sa, anplis bal yo pa janm fini, y ap tire tanzantan. Pa gen prezans polisye ni lajistis nan komin nan”.
Zak lagè sa pral lakoz konpayi gaz “Terminal Varreux” fèmen depi jedi dènyè nan komin Site Solèy. Akoz tout wout ki nan zonn sa enpratikab, kamyon paka pwoche. Anplis, gen lòt 2 bato gaz ki vini, men livrezon paka fèt, selon radyo Magik 9.
Atik sa se pwopriyete prive ©️ Gwoup Medya MAGHAITI 2022
