Aprè plizyè mwa depi yo te kanpe vòl yo nan vil Pòtoprens, Konpayi ayeryen Sunrise Airways reprann vòl li yo nan ayewopò Tousen Louvèti a jodi lendi 20 me 2024 la. Vòl sa a se premye vòl ki fèt nan ayewopò a aprè bandi ak zam pa t sispann fè atak epi tire toupre batiman yo.
Jan yo te anonse l la, konpayi a resi fè vòl sòti Pòtoprens pou ale Etazini jodi lendi a. Se yon desizyon yo pran pa rapò ak nouvo dispozisyon otorite yo te pran pou pwoteje ayewopò a.
Nan nouvo dispozisyon responsab yo te pran yo, yo kraze divès kay ki te bò ayewopò a, se te youn nan kondisyon konpayi yo te bay pou vòl yo reprann. Operasyon sa a te fèt 8 avril 2024 la, lameri Taba mete ak lapolis te rive kraze plizyè kay nan zòn nan.
Sepandan, vòl Sunrise ki reprann jodi a fèt nan menm tan ak rantre kèk gwo chèf Kenyan nan peyi a. «Nouvo orè JetBlue ak American Airlines gen pou yo retounen pou aktivite yo aprè polisye Kenyan yo vin ayiti», se sa a Miami Herald te mansyone nan yon atik yo te pibliye 10 me 2024 la.
Si n kwè jounal ameriken an, vòl konpayi American Airlines yo nan ayewopò entènasyonal Tousen Louvèti a ta dwe reprann 30 me k ap vini la. Pou sa a ki konsène JetBlue ak Spirit Airlines pa gen okenn dat ki bay pou aktivite yo konn fè yo.
Atik sa se pwopriyete prive © Gwoup Medya MAGHAITI 2024
