Nan lide pou pote presizyon sou videyo kliyan l yo ki te montre yo pa t sove nan gwo evazyon ki te fèt nan penitansye a, Me Nathalie Delisca deklare jodi lendi 4 mas 2024 la, Dimitri Herard se moun ki te fè sa l konnen pou te konseye 17 mèsenè kolonbyen yo pou yo te sove tou. Sepandan, li fè konnen se li k pa t vle pou yo sòti puiske tout kondisyon te reyini pou sa te fèt.
“Videyo nou wè ki viral sou rezo sosyo yo se mwen k te mande fè l pou mwen, nou tande gen yon moun anba anba ki t ap di yo an ale an ale. Se Dimitri Herard chèf USGPN nan palè nasyonal ak kèk polisye USP ki t ap di yo an n sòti”, se deklarasyon defansè kolonbyen yo ki fè konprann nonsèlman yo pa t sòti pou rezon sekirite yo men tou li soulinye 17 sitwayen yo ta bezwen konnen vrè asasen 58yèm prezidan an.
Se sa ki fè, mèt la deklare kliyan l yo te di l”nou menm tou nou entèrese konn kilès ki asasinen prezidan Jovenel “. Yon lòt kote, li presize pou fè tout moun konnen kolonbyen yo te nan menm selil ak Ezéchiel alyas Ze ki jounen jodi a se yon evade. Anplis, li revele pòtay selil la te rete gran louvri, e se moun menm ki te vinn chache yo pou sòti, kidonk selon li menm tout sa yo eksplike posibilite yo te genyen pou pa t rete anndan penitansye nasyonal la yo menm tou.
Yon lòt kote, genyen tou Me Marc Antoine Maisonneuve ki li menm eksprime l pou fè kwè avèk zak sa ki fèt sou prizon an, pwosè nan dosye ansasinay Jovenel Moïse la tou pap fèt ankò.
“Sa k fèt nan prizon an la se zèv gouvènman an. E se yon gwo kado gouvènman an bay puiske si kolonbyen yo te aksepte rale kò yo penitansye se yon gwo sèvis li t ap rann Ariel Henry ak tout ekip sa paske pa t ap gen moun ankò pou al douvan tribinal pou te ka anbarase pye l“, li di tout sa yo paske l estime pa t gen pyès mezi ki te pran pou te fè fas kare ak nèg ak zam yo tandiske se yon bagay yo te anonse depi byen lontan.
N ap raple depi ayè dimanch la, otorite polisyè yo te dedide pran tout 17 mèsenè kolonbyen yo pou ale ak yo nan lokal DCPJ a. Tandiske, rès prizonye yo yo menm ta twouve yo nan ansyen prizon sivil medam yo nan Petyonvil nan sousi pou ba yo plis sekirite.
Atik sa se pwopriyete prive ©️ Gwoup Medya MAGHAITI 2024
