Divès machann nan Wanament deside jodi dimanch 15 oktòb la, pou t al chache tout machandiz yo te genyen nan mache fwontalye Dajabón nan. Aksyon sila a pase aprè responsab platfòm machan Nòdès yo, Jesula Blanc, te fè anons la pase depi ayè samdi a.
Kontrèman ak enfòmasyon jounal Diario Libre bay jodi a pou fè konprann Ayiti ta louvri fwontyè pa l la pou fè komès ak Repiblik Dominikèn jodi dimanch la, machann ayisyen yo ak plizyè medya lokal fè konnen se pito nan objektif pou al pran machandiz yo te gen nan mache fwontalye Dajabón nan ki fè nou ka wè pòt Ayiti a louvri.
“Kantite moun sa yo nou wè ki nan pòtay mache binasyonal la, se machann yo ki te gen machandiz, machinn yo pral pran“, selon sa Ti Zo le Spécimen ekri sou paj li nan lide pou fè fas kare ak imaj ayisyen sa yo medya dominiken yo ap pataje sou rezo a pou di fwontyè ayisyen an louvri pou komès.
“Chofè ki gen machinn yo anndan an ap ka pase pou antre nan pòt la, osnon lòt moun ki gen afè yo pi lwen ap oblije vinn ak paspò yo pou fè pwosesis migratwa yo kounya, tout bagay ap fèt nan lòd”, se sa youn nan sòlda dominiken yo te deklare nan mikwo laprès avan menm machann yo t al pran machandiz yo sou bò dominiken an.
Yon lòt kote, jounal Diario Libre fè konnen responsab komès ant 2 peyi yo te tanmen yon reyinyon byen bonè maten an sou fwontyè a. Daprè sa yo rapòte, reyinyon sa te fèt nan lide pou te wè kòman yo ka antann yo pou komès la ta rekòmanse fèt ant 2 peyi yo.
Ajan enterimè Wanament la, Luma Demetrius, Yon komisyon komèsan ayisyen ak dominiken, biznisman Héctor Kilderes Taveras ak ajan espesyalize nan sekirite fwontalye ak terès(Cesfront) se kèk nan moun ki te nan reyinyon sila a.
Toujou nan kad chita pale sa, divès jounalis ki te sou plas fè konnen ajan enterimè Wanament la pa t vle bay okenn detay sou sa k te pale yo, malgre li te fè pati moun ki te reprezante Ayiti douvan responsab dominiken yo.
N ap raple, se menm ajan enterimè vil la ki te anonse 11 oktòb pase a, li te fè demach ak responsab dominiken yo nan yon premye reyinyon pou te fasilite machann ayisyen yo al pran machandiz yo nan Dajabón.
