Nan lide pou montre volonte yo pou kolabore pou enterè peyi a siyatè akò Montana yo fè konnen ayè lendi 12 jen an fòk Wo Konsèy Tranzisyon (HCT) an fè kèk chanjman pou yo ka abouti ak yon bon konsansis. Responsab yo plede pou yon konsansis kote k ap gen twa pouvwa ki etabli san fòs kote.
Alòske kèk siyatè akò a nan peyi Jamayik, kote divès aktè politik ak peyi CARICOM yo tanmen diskisyon sou kriz peyi a depi 11 jen pase a, plizyè nan sitwayen sa yo fè konprann yo pou yon konsansis menm jan sa ye pou akò Montana a.
“BSA ale Jamayik pou defann Ayiti“, se sa responsab akò a fè konnen pandan yo presize konsansis y ap mande a dwe jwenn baz li nan konstitisyon 1987 la ak twa pouvwa yo ki yo chak ap gen tout endepandans yo pou fè travay pa yo a.
“Tabli yon baz konsansyèl, tradisyonèl nan lespri konstitisyon 1987 la. 3 pouvwa leta yo ak yon egzekitif ak 2 tèt , mete yon gouvènman tranzisyon k ap kanpe tout move pratik nan leta a epi pou yo tande revandikasyon sosyete a, reyalize yon konferans nasyonal souveren ki gen rapò ak konstitisyon an ak pati politik yo“, se kèk nan pwopozisyon yo fè pou rive ak konsansis y ap mande a.
Pandantan sa, premye minis peyi Bahamas la, Philip Davis deklare nan 2yèm jounen diskisyon ayè lendi a selon kèk medya entènasyonal, si te gen yon bon jan solisyon pou retire Ayiti nan sa l ye a, aktè yo t ap gentan jwenn li. Pou sa, li di se yon aksyon rapid ki pou fèt, sa k ap ka sove lavi epi mete fren nan kriz peyi Dayiti ap viv la.
Atik sa se pwopriyete prive ©️ Gwoup Medya MAGHAITI 2023
