Nan yon lèt 7 senatè ameriken voye bay prezidan Joe Biden, yo pale de enkyetid yo fas ak sitiyasyon imanitè k ap develope nan peyi a, epi yo tou pwofite mande pou ta gen nominasyon yon nouvo anbasadè ameriken ak yon wo reprezantan diplomatik nan anbasad peyi Etazini, ki chita kò l nan Pòtoprens.
Nan lèt Sila, senatè yo nan yon bò panche yo sou kriz ki gen nan peyi a ki lakoz ensekirite, vyolans, vyòl, enkapasite polisye yo pou reponn ak bezwen popilasyon an, maladi kolera, ak ensekirite alimantè ki fè gen 4,7 milyon Ayisyen ki paka manje. Yo fè konnen tou, vyolans ki genyen an Ayiti a menase tout enterè nasyonal peyi Etazini.
“Vyolans san kontwòl k ap fè ravaj an Ayiti a se yon menas dirèk ki menase enterè nasyonal Etazini. Grenn priyorite Lèzetazini se pou l reponn ak soufrans sivil yo, pandan n ap soutni yon solisyon Ayisyen ak kriz la” daprè sa senatè yo ekri nan lèt la.
Nan yon lòt bò, palmantè ameriken yo salye jefò gouvènman ameriken an ki sanksyone nan tèt kole ak peyi Kanada kèk dirijan ayisyen nan sektè politik la ak nan sektè ekonomik lan. Yo estime tou, son w bon jès dèske gouvènman Biden lan pa ekate posiblite pou tout aktè politik ak sosyete sivil la gen yon dyalòg politik nasyonal.
Pandantan sa a, malgre yo site tout sa yo, yo ta sanble vle pou gouvènman Biden lan ta fè plis ” nou dwe fè plis”, se sa yo estime nan lèt sila kote yo mete aksan tou, sou pòs anvwaye espesyal an Ayiti a ki pa gen pyès moun nan tèt li depi aprè demisyon Daniel Foote depi septanm 2021.
Lèt sa pote siyati senatè Robert Menendez, Cory A.Booker, Chaule Salumen, Charles E. Schumer, Dica Richard Durbin, Tim Kaine, Raphael G. Warnock ak Ben Cardin.
Atik sa se pwopriyete prive ©️ Gwoup Medya MAGHAITI 2022