Nan objektif pou netwaye sistèm jistis ayisyen an epi fè kèk chanjman, Konsèy Siperyè Pouvwa Jidisyè a(CSPJ) fè konnen nan yon pwosè vèbal yo bay pandan semèn nan, gen 7 majistra yo retire nan sistèm jidisyè a. Alòske, yo di gen 28 lòt ki yo menm rive sètifye.
Dudié Prophète sipleyan jij pou lapè nan tribinal Katye Moren, Luc Kerlin Charles sipleyan jij pou lapè nan tribinal Sodo a, Lyonel Ralph Dimanche ansyen dwayen tribinal premye enstans Kwadèboukè, Ernest Isaac jij syèj nan tribinal premye enstans Miragwàn. Genyen tou, Gesner Morrisset jij nan tribinal premye enstans nan Okap, Bruno Leriche jij enstriksyon nan tribinal premye enstans nan Kwadèboukè, epi Chérimond Saint Julien jij enstriksyon nan tribinal premye enstans Miragwàn, se 7 moun sa yo jounen jodi a CSPJ retire nan sistèm Jidisyè Ayisyen an pou move konpòtman.
Daprè presizyon responsab yo pote nan rapò a, 7 majistra sa yo se moun ki te bay fo diplòm Klas filo yo. Yo di tou, majistra sa yo pa t onèt nan sa yo t ap fè a( yo pran lajan nan men moun ki dwe jije, yo patisipe nan zak ki gen fwod).
Pandantan sa yo di yo te gen 82 dosye antou pou yo te trete, pami yo 42 majistra ki fenk diplome nan lekòl majistrati a(EMA), yon grefye(fanm) ki ta dwe antre nan magistra. Konsa, yo di gen 28 majistra ki jwenn otorizasyon pou rete nan kò jistis la, Nou ka site, Me Bernard Saint-Vil, Kébreau Zamor, ak Matthieu Chanlatte.
N ap raple nan mwa janvye 2023 a, Konsèy Siperyè Pouvwa Jidisyè a te retire 28 majistra deja nan sistèm nan pou menm dosye “entegrite moral” yo pa genyen an.
Atik sa se pwopriyete prive ©️ Gwoup Medya MAGHAITI 2023
