Nan yon ankèt Òganizasyon Migrasyon Entènasyonal (OIM) pibliye mèkredi 8 me 2024 la, yo fè konnen sòti 25 avril pou rive 5 me a gen 5 178 moun ki kouri kite zòn yo nan Dèlma 24 ak Solino. Selon sa yo fè konprann, nan chif sa yo yo jwenn gen refijye ki te nan 6 kan anplis lòt abitan ki pot ko kite zòn yo.
«An konsekans ak atak sa yo moun ki t ap viv nan 6 sant refijye ki te nan katye Site nimewo 2, Kafou Peyan, 2yèm site Sen Maten, Sylvio Cator ak Dèlma 28 te blije kite kote sa yo. Antou 5 178 moun kite zòn sa yo, li gen ladan l moun ki te nan sant yo anplis abitan Dèlma 24 », se sa yo di nan rapò sa a.
Pi lwen, OIM soulinye nan moun sa yo ki kouri a gen 2 654 ladan yo sa vle di 51% ki jwenn refij kay fanmi yo tandiske 2 524 lòt ki bay yon total 49% twouve yo nan 10 kan refijye. Selon yo menm se komin Pòtoprens, Dèlma, Kwadèboukè ak Taba moun sa yo blije kouri ale.
Pandan sit ki nan Dèlma 24 yo vid jounen jodi a, ankèt la fè konprann gen 6 nouvo kote moun yo apèn pran pou rete. 2 nan yo nan zòn Dèlma espesyalman nan lekòl Paul Lochard ak Teren enpas Medilyen alòske 4 lòt yo chita kò yo nan Solino se : Legliz Konsekrasyon Jezi, Mòn Ti Klod, Mòn Priyè nan Nazon ak lekòl Nasyonal Ajantin Bèlgàd ki nan Ravin Pentad.
Atik sa se pwopriyete prive © Gwoup Medya MAGHAITI 2024
