Nan lide pou pèmèt machann yo ak chofè kamyon yo al pran machandiz yo genyen nan lòt bò zile a, delege depatmantal Nòdès la, Moïse Charles Pierre te anonse ayè vandredi 3 novanm nan y ap louvri fwontyè nan bò Ayiti a jodi samdi 4 novanm nan ak mèkredi k ap 8 novanm 2023 a, selon sa jounal Le Nouvelliste rapòte.
Desizyon sila pran se aprè te gen yon reyinyon ant otorite lokal yo ak otorite dominikèn yo nan Wanament ayè vandredi a. Nan reyinyon sa a, responsab 2 peyi yo te rive mete yo dakò pou entreprenè ak machann ayisyen yo al pran machandiz yo genyen Sendomeng.
Daprè sa responsab ayisyen an di, 2 dat sa yo se pa tout moun k ap ka deside al pran machandiz. Li presize jodi samdi a se pou mèt oubyen chofè kamyon yo tandiske mèkredi k ap 8 novanm nan se ap pou komèsan yo, pandantan sa li fè konnen se sèlman kategori moun sa yo k ap gen aksè ak fwontyè a nan dat nou sot site la yo.
“Yon lòt fwa ankò nou bay entreprenè ak komèsan ayisyen yo 2 jou pou al chache machandiz yo genyen ki nan depo mache binasyonal Dajabón nan an Repiblik Dominikèn“, se sa delege depatmantal Nòdès la te fè konnen ayè vandredi aprè reyinyon an te finn fèt.
Yon lòt bò, vis delege depatmantal Nòdès la, Harold Joseph li menm li fè konnen jodi a nan mikwo laprès ayisyèn, jounalis dominiken yo t ap tante chache rezon ki fè Ayiti pa janm deside louvri fwontyè a toutbon pou ta gen bon jan echanj komèsyal ant 2 peyi yo. Nan sans sa, li fè konprann li te reponn yon fason pou fè yo konnen menm jan Sendomeng se yon peyi, se konsa tou Ayiti se yon peyi tou ki gen yon pakèt lwa ak règleman, epi gen diyite l pou fè kèlkeswa moun ki vle derespekte l la respekte l nòmalman.
Atik sa se pwopriyete prive ©️ Gwoup Medya MAGHAITI 2023
