Lapolis arete mèkredi 28 dawout pase a polisye Yvenson Benoît akoz li ta enplike nan asosiyasyon malfèktè ak detounman kamyon machandiz.
Polis Nasyonal Ayiti (PNH) nan yon repòtaj odyovizyèl jounen vandredi 30 dawout 2024 la prezante Yvenson Benoît, yon ajan polis ki jwenn arestasyon l poutèt li ta nan move zafè.
Polisye sa ki sòti nan 27yèm pwomosyon PNH la afekte nan DDO 1. Li ta patisipe ak plizyè lòt endividi nan detounen yon kamyon diri nan lannuit 24 pou louvri 25 dawout pase a. Aksyon sa li ta fè li nan Dèlma 32, zòn li menm li rete, selon detay responsab polisyè yo bay.
Mete sou sa, lapolis fè konnen arestasyon polisye 35 lane a vini aprè yon alèt polis nan jiridiksyon Dèlma te jwenn. Sa ki te fè yon patwouy Brigad Entèvansyon (BI) te deplwaye prese prese.
Daprè otorite yo nan PNH la, akize a ak konplis li yo te tire sou patwouy la nan moman l t ap rive a men yo pa t pran tan pou te reponn. Nan detay li bay, enstitisyon polisyè a fè konnen Yvenson Benoît te kouri paske l pa t ka reziste. Se nan konsa yo soulinye zam PNH te ba li a, yon 9 milimèt ak tout chajè ki gen 15 katouch, te rive tonbe.
Bò kote sispèk la, li t ap tante voye jete tout akizasyon ki peze sou do l yo . Se pou sa li deklare li pa t tire kou sou konfrè polisye li yo li te sèlman rale pyès li pou l pwouve li se polisye malgre sa ajan fòs lòd te tire.
Pandan Yvenson Benoît fè konnen li pa gen anyen pou wè ak akizasyon ki peze sou do l yo, enstitisyon an li menm konfime polisye 27yèm pwomosyon an te gentan sezi telefòn travayè kamyon an epi kase tèt chofè a.
Atik sa se pwopriyete prive ©️ Gwoup Medya MAGHAITI 2024
