Maten lendi 23 septanm 2024 la, bandi ak zam nan yon ti bis touye Pierre-Louis Dieuné. Ki se yon polisye ki sòti nan 18yèm pwomosyon Polis Nasyonal Ayiti (PNH) a.
Daprè pòt pawòl adjwen PNH la, Lionel Lazarre yon lòt ajan fòs lòd sòti blese ak bal pandan atak sa. Li eksplike sa rive nan moman ajan polis yo t ap tante kanpe ti bis sa ki te gen ladan l nèg ak zam yo nan zòn Dèlma 33.
Nan detay li bay, Lionel Lazarre fè konnen 2 polisye sa yo ki nan sèvis sikilasyon te rapousuiv ti bis la nan lide pou te kanpe yo. Men bandi yo te tire sou yo nan Dèlma 19, zòn mache Seradòt.
Se sa ki fè 2 polisye sa yo pran bal pami yo Pierre-Louis Dieuné li menm al rann dènye souf li sou kabann lopital. Pou sa ki gade lòt polisye a ki li menm sòti nan 26yèm pwomosyon lapolis la, pou kounye a li ap pran swen lopital. Pwiske lòt patwouy polis te pote yo sekou san pran tan kote yo te rive al lopital.
Depi kèk tan, bandi yo pa sispann atake popilasyon an sitou nan mitan enstitisyon polisyè a, kote plizyè ajan viktim zak vyolans bandi yo.
© Tous droits réservés – Groupe Média MAGHAITI 2024
