Nan dat 17 janvye 2025 lan, yon gwoup sitwayen nan Gwomòn lanse yon petisyon pou di non ak prezans chantè Gracia Delva nan komin nan. Petisyon sa lanse pou anpeche mizisyen an ak tout djaz li Mass Konpa vin jwe 2 fevriye k ap vini la nan fèt «Notre de la Chandeleur» k ap fèt nan vil sa. Petisyon sa ki dwe rive ak 200 siyatè, gentan genyen 183 moun ki siyen l.
Desizyon pou anpeche chantè Mass Konpa a al jwe Gwomòn nan pran akoz inisyatè a, Dieuné Racine, site sanksyon palmantè a pran nan men Kanada poutèt li ta nan tete lang ak bandi. «Gracia Delva, yon figi kontestab ki sanksyone pou move zafè, ki akize pou sipò li bay gwoup kriminèl òganize yo depi kèk tan nan depatman Latibonit pa dwe vin pyafe nan komin mango fransik la», se sa nou li nan petisyon sa.
Pou kontinye jistifye desizyon yo a, sitwayen yo raple nan dat 23 avril 2019, prezidan komisyon jistis ak sekirite nan sena repiblik Ayiti te deklare li jwenn relve telefonik kote ansyen palmantè a te pale pandan 24 fwa ak ansyen chèf gang Arnel Joseph. Ki li menm te konn simen latwoublay nan peyi a. Yo soulinye prezidan komisyon an, te fè kwè apèl sa yo te dire 10 minit pou pi piti tan, e yo te fèt sòti 15 janvye pou rive mwa mas 2019.
Pi lwen, sitwayen yo estime vini mesye Delva nan komin Gwomòn ap mete lavi popilasyon an an danje. Kidonk yo mande ak otorite konsène pou yo poze bon jan aksyon pou anpeche aksyon sa rive fèt. Yo pèsiste pou di prezans Gracia Delva senbolize yon abi pou dwa moun epi se tankou yo krache sou san malere ak malerèz y ap sibi vyòl, kidnaping chak jou.
Atik sa se pwopriyete prive ©️ Gwoup Medya MAGHAITI 2025
