Daprè yon atik jounal Miami Herald pibliye jodi madi 24 septanm 2024 la, yon òganizasyon k ap defann dwa ayisyen mande pou yo arete ansyen prezidan Donald J. Trump ki se kandida pou prezidan nan pwochen eleksyon yo, ak akolit li JD Vance. Demann sa fèt paske òganis la estime 2 moun sa yo te fè fo deklarasyon sou Ayisyen nan vil Springfield (Ohio) sa ki te lakòz gwo menas bonm ak lòt dezòd nan sèvis piblik vil sa a.
Haitian Bridge Alliance ki nan San Diego se non òganizasyon sa k ap defann Ayisyen yo ki deside depoze yon aksyon an jistis nan tribinal minisipal Clark pou mande yon jij pou l arete 2 mesye yo poutèt yo vyole 7 lwa Ohio.
Selon sa jounal la rapòte, se responsab «Alliance» lan, Guerline Jozef ki depoze aksyon sa pou kapab ede manm kominote ayisyèn nan ki ap grandi Springfield la fè fas ak konsekans fo akizasyon sa yo. «Daprè lwa Ohio a, yon sitwayen prive ki konnen yon moun te komèt yon krim ka mande yon tribinal pou konfime gen yon koz pwobab pou komèt yon krim epi bay yon manda pou arete», se sa jounal la soulinye.
Pi lwen, jounal ameriken an fè konnen, Guerline Jozef nan aksyon legal li a, mande pou yon jij olye pou biwo pwokirè ki revize demann li an. Yon lòt kote, li presize avoka poko aji pou pwoteje kominote a epi rann Trump ak Vance responsab pou mal yo te pwovoke a.
Nan sans sa, Haitian bridge Alliance mande respè pou tribinal sa a, poukont li. Li swete tou jwenn yon koz pwobab baze sou reyalite yo prezante a epi bay manda pou arestasyon Trump ak Vance. Responsab Alliance lan mande pou yo pran yon desizyon prese anvan Trump vizite Springfield, pou semèn sa a.
N après soulinye otorite yo nan vil la te di pa gen okenn prèv ayisyen yo te manje chat, chen ak bèt sovaj vwazen yo vre. Poutan, Trump ak patizan li an pa t sispann repete manti sa yo.
Trump te kontinye ap kenbe rimè a lè l te repete l pandan deba prezidansyèl li fas ak vis prezidan Kamala Harris, kandida demokrat la, nan kòmansman mwa sa a. «Nan Springfield, yo manje chen yo, moun ki te vini yo, yo manje chat, yo manje bèt moun ki rete la. E se sa k ap pase nan peyi nou an, e se yon wont», se sa Trump te deklare nan deba a.
Madanm Jozef akize Trump ak JD Vance paske yo vyole plizyè lwa, tankou fo deklarasyon ki te mennen ak dezòd jous rive fèmen lekòl.
© Tous droits réservés – Groupe Média MAGHAITI 2024
