Nan aprè midi jedi 23 janvye 2025 lan, yon moun rive pèdi lavi l ak plizyè lòt sòti blese ak bal nan yon mouvman pwotestasyon nan vil Akayè. Manifestasyon sa fèt nan lide pou pwotestatè yo denonse nominasyon vis delege awondisman Akayè ak Kabarè a, Jean Rodrigue Paul.
Plizyè dizèn moun te pran lari pou di non ak nominasyon nouvo vis delege a. Yon mouvman ki te kòmanse pasifik jiskake plizyè moun ta pral blese grav anba bal epi yon lòt ta pral mouri nan moman pwotestatè yo te pran yon poz devan komisarya a. Pandan tout pakou a, manifestan yo t ap mande manm Konsèy Prezidansyèl Tranzisyon yo (KPT) tounen sou desizyon an. Pwiske yo estime se yon moun ki pa konn anyen sou awondisman an yo mete nan pòs sa.
Daprè enfòmasyon majistra Akayè a, Jean Edner Gilles kout bal yo ta pral tire pandan moun yo te deside pran yon poz devan komisarya a. Li fè konnen tou, moun ki blese yo ale lopital pou yo jwenn swen ka yo nesesite.
N ap soulinye, madi 21 janvye pase a popilasyon an te deja bloke wout nasyonal nimewo 1 an toujou pou te pwoteste kont nominasyon vis delege Akayè, ak Kabarè a, Jean Rodrigue Paul.
Atik sa se pwopriyete prive ©️ Gwoup Medya MAGHAITI 2025
