Alòske premye enfòmasyon yo te releve genyen 3 blese nan atak gang yo te fè ayè madi 21 janvye 2025 lan sou 3 machin konsila endyen an nan peyi a. Jounal Miami Hérald, nan yon atik li pibliye jodi mèkredi 22 janvye a fè konnen genyen yon moun mouri e 5 lòt sòti blese.
Jounal ameriken an fè konnen pami blese yo, youn ladan yo se manm fanmi konsil onorè peyi End lan. Li menm li pran yon bal nan janm nan moman machin li te ladan l lan te resevwa bal. Pi lwen, jounal la site rapò Halo Solutions Firm S.A, yon estrikti k ap suiv ensidan sekirite yo nan peyi a, pou di 2 lòt machin yo te atake tou. Nan moman aksyon an pase sou wout Ayewopò a, youn nan chofè yo te blese nan vant e nan yon kondisyon grav, pandan lòt la li menm li te blese nan janm, men li nan yon kondisyon ki plis estab.
Nan menm atak sa, 3yèm machin nan ki pa t blennde te resevwa bal e yon fi, ki se yon asistan pèdi lavi l daprè sa medya entènasyonal la deklare. Li fè konnen tou, chofè a ak yon lòt pasaje pou chape anba menas sa te oblije kouri e kriminèl yo te rive mete dife nan machin nan.
Yon jou aprè atak sa ki fèt sou machin Konsila Endyen an, pyès otorite ayisyen poko reyaji sou sa ki pase a. N ap raple, plizyè nan gwo ofisyèl yo twouve yo nan vil Jakmèl pou akeyi vizit Prezidan kolonbyen an, Gustavo Petro.
Atik sa se pwopriyete prive ©️ Gwoup Medya MAGHAITI 2025
