Claire Guirand Villard se non dam sa ki pèdi lavi l nan lannuit vandredi 15 novanm 2024 la aprè l te fin resevwa yon bal mawon lakay li nan Tijo. Selon plizyè medya lokal, viktim nan ta yon fanmi chantè gwoup Vayb la, Michael Guirand.
«Mèsi peyi m», se mesaj sa nou wè atis la pataje sou kont Enstagram li aprè anons nouvèl lanmò madanm nan.
Mete sou kote lanmò sa, plizyè santèn moun kontinye ap kite lakay yo. Sitou nan lannuit vandredi 14 novanm nan kote plizyè zòn tankou Kriswa, Nazon, Lali, Avni Poupla pase yon move moman anba kout bal, epi divès kay pase anba flanm dife.
Pou kounye a, bandi ak zam yo menm rive mete dife nan ponp gaz ki chita kò l nan Avni Poupla a. Pandan lopital EPHATA a li menm ki pi douvan an te gentan anonse li fèmen pòtay li, puiske zòn sa anba gwo menas gang yo.
Atik sa se pwopriyete prive ©️ Gwoup Medya MAGHAITI 2024
