Feriol Chelton, se non jèn jounalis ayisyen sa ki rive pèdi lavi l jodi vandredi 13 septanm 2024, la nan lopital Sent Terèz nan Miragwàn. Lanmò jounalis la rive se akoz li pa t gen 1500 goud pou l te pran swen nan lopital sa aprè l te finn fè yon aksidan moto.
Feriol Chelton ki viktim yon aksidan moto maten vandredi a, te al rann dènye souf li sou kabann lopital paske l pa t gen posiblite pou l peye pou l te kapab ranpli preskripsyon medikal yo.
Daprè enfòmasyon plizyè medya rejyonal pataje, yon konfrè te eseye wè si l te ka fè viktim nan benefisye tretman an nan men doktè yo. Men, sa pa t rive fèt paske li te manke lajan e se sa ki fè jounalis 28 lane a jwenn lanmò l.
Nan sikonstans sa, fanmi viktim nan lonje dwèt sou responsab yo nan lopital la kòm moun ki ta lakoz jounalis la mouri. Se pou sa, yo pwofite mande ak fanmi ki gen malad pou yo pa vin nan lopital sa avèk yo paske moun ki la pou bay swen yo pa pran ka malad yo. Daprè pawòl fanmi an pèsonèl sante lopital sa plis rete nan telefòn olye yo sove lavi pasyan.
Atik sa se pwopriyete prive ©️ Gwoup Medya MAGHAITI 2024
