Anviwon 3 moun sòti blese ak bal nan yon afwontman ki te genyen jodi lendi 30 desanm 2024 la, ant kèk polisye ak ajan Brigad Sekirite pou Lè Pwoteje (BSAP) nan vil Laskawobas. Pami moun ki blese yo, genyen jounalis Jhordentz Pierre Louis ki se direktè pwogramasyon nan Radio ICI FM.
Daprè sa responsab yo nan Radio ICI FM deklare, jounalis la te resevwa bal la nan do e deja ap pran swen lopital menm jan ak lòt viktim yo.
Anplis viktim sa yo, genyen tou dega materyèl ki anrejistre nan vil sa a. Selon medya lokal yo popilasyon an ta mete dife nan 2 machin ak tout lokal BSAP la.
N ap fè konnen, aksyon sa vini aprè ajan BSAP yo te maltrete polisye Woodjerry Rateau, ki nan Polifront, ayè dimanch 29 desanm 2024 la. Fòk nou di, depi aprè zak sa bal pa t sispann chante nan vil la pou jis jodi lendi a kote menm rive gen viktim nan popilasyon an.
Atik sa se pwopriyete prive ©️ Gwoup Medya MAGHAITI 2024
