Jij federal John Coughenour sispann pou yon ti tan jodi jedi 23 janvye 2025 lan dekrè prezidan Donald Trump te pran pou te retire dwa timoun ki fèt sou sòl la, ki gen paran ilegal, vin gen nasyonalite amerikèn.
Jij la pran desizyon sa paske l estime dekrè a pa gen anyen pou wè ak konstitisyon amerikèn nan. Nan sans sa, li deklare se yon lòd ki enkonstitisyonèl.
Daprè CNN, jij John Coughenour te akòde yon demann bò kote pwokirè jeneral Washington nan, Nick Brown, ak 3 lòt eta demokratik. Sa te fèt nan lide pou dirije yon lòd ijans pou sispann aplikasyon politik la pou 14 jou k ap vini yo, annatandan plis seyans fèt nan kad kontestasyon jidisyè k ap fèt yo.
Medya ameriken an soulinye, menm eta demokrat yo ap dirije yo mande yon òdonans pou kanpe pandan yon ti tan dekrè Donald Trump. Yo mande sa paske daprè sa yo di, li se yon vyolasyon 14yèm amannman konstitisyon an ki li menm bay garanti pou tout timoun ki fèt sou tè a genyen sitwayènte ameriken.
Pandantan sa, genyen Lane Polozola ki se avoka nan eta Washington ki fè jij la konnen timoun paka sispann fèt pandan tribinal la li menm l ap etidye dosye a.
N ap fè remake, dekrè sa nouvo prezidan ameriken an te siyen menm jou li envesti nan fonksyon li a te entèdi gouvènman federal la bay paspò, sètifika ki pwouve sitwayènte oswa lòt dokiman ak kèlkeswa timoun ki fenk fèt, ki gen paran yo ki gen estati ilegal osnon tanporè Etazini.
Atik sa se pwopriyete prive ©️ Gwoup Medya MAGHAITI 2025
