Jij Campbell Barker ki nan zòn Texas bloke ayè jedi 8 novanm 2024 la pwogram «Keeping Families Together ». Pwogram sa gouvènman Joe Biden nan ki te mete li sou pye nan mwa jen 2024 la, e li te benefik pou kèk imigran san papye ki te rive marye ak yon ameriken.
« Pwogram sa te mete yon ti kras santiman sekirite lakay prèske 500 000 imigran ki te dwe benefisye l. Jouskaske jij Campbell Barker te sispann li nan mwa dawout la », daprè sa AP News fè konnen. Puiske kounye a jij la bloke yon lòt fwa pwogram nan, li fè kwè administrasyon Biden nan te depase otorite l avèk politik sa, ki selon li menm, pa respekte lalwa amerikèn yo.
« Politik sa te gade moun ki gen pou pi piti 10 lane ap viv Etazini, li pwoteje moun yo kont depòtasyon. Anplis moun marye, men li te aplike pou timoun san papye ki pitit sitwayen ameriken tou », se sa CNN fè konprann.
N ap soulinye, jij Barker se te Donald Trump ki te nonmen l depi sou premye manda li a. Dezisyon li pran an vini nan yon moman kote milyonè ameriken an sot genyen eleksyon yo, pandan nan tout kanpay li yo li te pwomèt li pral fini ak pwoblèm migrasyon Etazini genyen an.
Atik sa se pwopriyete prive © Gwoup Medya MAGHAITI 2024
